Политика

Эмилбек Каптагаев: "Саткын" деп биринчи кезекте, Атамбаевди айтсак жарашат

5 августа 2019 года, 09:40 Рубрика: Саясат

Автор:

Эмилбек Каптагаев: "Саткын" деп биринчи кезекте, Атамбаевди айтсак жарашат

Мурунку президент Алмазбек Атамбаев "мамлекетти тоотпойм, мыйзамды тоотпойм, атышам, тытышам" - деп Койташта "корбашы болуп отургандыгы бул саткындык. Мындай кадамдары менен Атамбаев з керт башынын кызыкчылыгы үчүн кыргыз мамлекеттүүлүгун сатып жатат, укуктук тартипти, мыйзамдуулукту садага чаап жатат, - деген пикирин коомдук ишмер Эмилбек Каптагаев Фейсбуктагы баракчасында билдирди.

Анын айтымында, Атамбаев маселесине байланыштуу "сатып кетти, саткын" - деген тема абдан учурлаш болуп калды... Анткени Атамбаев жана анын командасы ушул темда кызылкулактык кылышып, президент Жээнбековга "саткын" деген жарлыкты жабыштыруунун аракетин аябай эле катуу кылып жатышат...

Каптагаев ошол себептен улам бул маселе боюнча калыс пикирин айтууну туура көргөнүн айтат.

«Биринчиден, Атамбаевдин "сатып кетти" деп Жээнбековга айтып жатканы бет тырмарлык, муну биз так кесе эле айтуубуз зарыл. Анткени, Атамбаев өзү "досум" деп айтып жүргөн Сооронбай Жээнбековду эки айрылыш жолго кептеп койду, ал "досунун" сөзүн угуп, анын айтканы менен болсо анда Өлкөнү, Элди, Мамлекеттик кызыкчылыкты саткан бомок, аларды жеке кызыкчылыктар үчүн курмандык кылган болмок, мындай кадам анан абийирине, ыйманына туура келбеди, ошондуктан ал Өлкө тарабына ыктап, "досу" Атамбаевге кескин түрдө ЖОК деп айтты. Бул саткындык эмес, бул ЭРДИК», - деп эсептейт коомдук ишмер.

Каптагаевдин айтымында, ал эми Атамбаевдин арам оюн жакында эле СДПК партиясы өзү - биз Жээнбековду жетелеме, өз ою жок, чабал президент болот деген ой менен алып чыгып, колдоо көрсөткөнбуз деп тастыкташты.

Мурунку губернатордун пикиринде, көрсө Атамбаевдин командасы Жээнбековду жандалбас уруп колдошконунун сыры ушул жакта экен.

«Атамбаев деле "жаңылып калыптырмын" деп атпайбы, көрсө ошол "жетеленме" деп жаңылганын айтып жаткан турбайбы ал дагы. Экинчиден, Атамбаевдин өзү "сатып кетти, саткын" деп айтууга эч кандай моралдык укугу жок. Анткени бул маселе боюнча анын өзүнө толгон токой суроо бар», - дейт Каптагаев.
Буга мисал кылып коомдук ишмер 2006 жылдан бери Атамбаевдин кылган иш-аракеттерин мисал кылып келтирет.

- 2006-жылдагы ноябрь митинги курчуп, аянтта эл кайнап турганда ал жерден Атамбаевди тапай калып, анан анын Бакиевдин кабинетинин кабылдамасында отурганын угуп шок болушканын ошол окуянын катышуучулары айтып да жазып да жүрүшөт. Ушундан улам ким саткын? - деген суроо табигый түрдө эле жаралат.

- 2007-жылы Кулов, Текебаев, Сариев, Субаналиев, Эшимканов жана башка лидерлер башында турган оппозициялык күчтөр биригип, Элдик фронт түзүп, апрель айында борбордук аянтта мөөнөтсүз митинг өткөрүп жатканда, "көпүрө боло калам" - деп Бакиевге бара калып, Өкмөт башчысынын кызматына дайындалып, анан митингди күч менен кубалап, ал жердеги боз үйлөрдү таш талкан кылып талкалап, элди койго теңеп шылдың кылып сүйлөгөн ким эле? Албетте Атамбаев болчу. Анан ким саткын?

- 2010-жылы декабрь айында СДПК партиясына берилген башкаруучу коалиция түзүү укугунан пайдалана албай, түзө албай шалдырап отуруп калганда "Республика" партиясы коалиция түзүп, түзмөк турган Өмүрбек Бабанов лидерликти банкрот болуп отурган Атамбаевке берип, аны Өкмөт башчысы кылып дайындаганын да эл билет. Ошол учурда Өкмөт башчысы болуп бийликке илешпей калса кийинки 2011-жылы Атамбаедин президент болоорун ким билет эле... Ошо боюнча жээкке сүрүлүп кала берүүсу да мүмкүн болчу. Эми ошентип жол бошотуп берген Бабанов эмне болду, аны болбогон шылтоо менен куугунтап, элге жарыя кылып "шестерканын орду түрмөдө" деп кыйкырган ким эле? Албетте Атамбаев. Ошондо ким саткын?

- Ошол 2010-жылдын декабрында Бабанов өзү Атамбаевге жол бошотуп берип жатканда аны колдошуп, кол алышып, өткөн-кеткенди сууга салышалы, Өлкө үчүн биргелешип кызмат кылалы деп колдоп кетишкен, андан кийин 2011-жылы президенттик шайлоодо да колдоо көрсөтүшкөн Акматбек Келдибеков, Камчыбек Ташиев, Садыр Жапаровдордун тагдыры эмне болду? Аларды ким түрмөгө каматты? Албетте Атамбаев. Ошондо ким саткын болот?

- Атамбаевди этегине калкалап, ар кандай татаал саясий кырдаалдарда калкалап, сөз тийгизбей жүрүп президент кылган Роза Отунбаев экенин саясатка аралашкан дагы, аралашпаган да киши билет. Аны Атамбаевдин өзү деле айткан (видеосу азыр деле бар ютубда). Кийин "төө кыядан өткөн соң" дегендей кылып Роза Исаковнанын кадырын тепсеп, өзүн жок кылуунун аракетин кылган ким? Албетте Атамбаев. Анан ким саткын?

- 2010-11-жылдары Убактылуу Өкмөттүн мүчөлөрү дээрлик толугу менен Атамбаевди колдоп, аны лидер катары президенттикке көрсөткөнү тарыхый чындык, ошол учурдагы кырдаал ошондой болчу. Анан эмне болду? Убактылуу Өкмөттүн мүчөлөрүнө карата Атамбаев кандай гана кыянаттыктарды жасабады, Текебаев, Чотонов түрмөдө отурат, Дүйшөбаев, Каптагаев, Сариев, Бекназаров, Өмүркуловдорду камоонун аракетин кылды... Бул эмне саткындык эмеспи?

- 2010-жылы Апрель революциясында эл "үйбүлөлүк-кландык" башкарууну жок кылабыз, коррупциянын тамырын кыркабыз деп көтөрүлгөн... Ошол учурда шейит кеткен, кийин жаракаттын азабынан каза болгондордун саны 130 га чукулдап калды... Ал эми Атамбаев эмне кылды? Ар кандай саясий оюндар менен бийликти узурпация кылып басып алды, кландык башкаруунун кайра орнотту, коррупцияны ого бетер өстүрду... Бул эмне саткындык эмеспи? Революциялык идеяларды, шейиттердин канын сатты да Атамбаев.

«Эми болсо "мамлекетти тоотпойм, мыйзамды тоотпойм, атышам, тытышам" - деп Койташта "корбашы болуп отурат. Бул да саткындык. Атамбаев Кыргыз Мамлекеттүүлүгун сатып жатат, укуктук тартипти, мыйзамдуулукту садага чаап жатат өз керт башынын кызыкчылыгы үчүн.

Ошондуктан, урматтуу замандаштар, Өлкөнүн, элдин кызыкчылыгы, мамлекеттин келечеги үчүн жоопкер бололу, ким айтса дагы Атамбаевдин "сатып кетти, саткын" деген сөздөрдү айтууга укугу жок экендигин так айталы, Атамбаевдин саткындыгы, саясий бет тырмарлыгы өз башы менен кетсин дейли», - дейт Каптагаев.

Бөлүшүү:

Megacom