Социалдык фонддун жетекчилери ар бир райондон акча чогултуп, шайлоо өнөкөтүндө бир партияны колдошкон. Бул тууралуу Улуттук Коопсуздук Комитетинин жетекчиси Камчыбек Ташиев 24 декабрда пресс-конференция убагында  билдирди.

«Социалдык фонддун жетекчилери ар бир райондон 40-45 мин сомдон акча алып, кайсы бир партияны каржылап турган. Ушундай эле көрүнүш Мамкаттоо кызматында да болгон. Биз бул иштерди изилдеп, анын натыйжасында бир топ аткаминээрлер кармалды», – деди Ташиев.

Анын айтымында, мындан ары коррупцияга аралашкан мамлекеттик кызматкерлер дароо жоопкерчиликке тартылат.

«Эми ким кимден акча талап кылса, дароо камалат.  Муну коррупция менен алектенгендер эсине бекем түйүп коюшсун», – деп баса белгиледи.

Ошондой эле УКМК жетекчиси мурдагы президенттин Жогорку Кенештеги ыйгарым укуктуу өкүлү Курманбек Дыйканбаев кайсы бир ишканадан 7 млн сом алгандыгын ачыкка чыгарды.

«Ал кайсы ишканадан акча алгандыгын айта албайм. Бирок 7 млн сом акча алган деген факты тастыкталган», – деп билдирди Ташиев.

Эскерте кетсек, буга чеийин Социалдык фонддун төрагасы Медер Ирсалиев аймактык бөлүмдөрдөн акча талап кылуу фактысы менен кармалган.